Breaking News

သက်ငယ်မုဒိန်းမှု ကျူးလွန်သူတွေကို သေဒဏ်ပေးသင့်ကြောင်း ဖွင့်ဟလာတဲ့ ယွန်းရွှေရည်



အနုပညာလောကထဲမှာ နှစ်ပေါင်းများစွာ ကျင်လည်ရင်း နာမည်တစ်ခုရရှိထားသူကတော့ ယွန်းရွှေရည်ပါ။ သူမဟာ ဇာတ်ပို့နေရာတွေတုန်းကလည်း ဇာတ်ပို့တစ်ယောက်လို၊ မင်းသမီးနေရာရောက်လာပြန်တော့လည်း မင်းသမီးတစ်ယောက်လို ဟာသကားကစလို့၊ ဒရာမာမကျန် ပီပီပြင်ပြင်သရုပ်ဆောင်နိုင်တဲ့သူ ဆိုရင်လည်း မမှားပါဘူး။ လက်ရှိမှာတော့ ဗီဒီယိုဈေးကွက်အနေအထားကြောင့် ဗီဒီယိုကားရိုက်ကူးမှုနည်းပါးနေသလို ကားကြီးတွေသာရိုက်ဖြစ်နေရတယ်လို့ပြောလာတဲ့ယွန်းရွှေရည်ရဲ့ လက်ရှိဇာတ်ကားရိုက်ကူးမှုများကြောင်းကို တွေ့ဆုံမေးမြန်းဖြစ်တဲ့အခါ

-အခုရိုက်နေတဲ့ကားလေးအကြောင်း အရင်ပြောပြပေးပါဦး။

ကိုပေါက်တို့ထုတ်လုပ်ရေးကရိုက်တဲ့ကားကြီးပေါ့။ ကားနာမည်က ဆယ်လီတဲ့။ ပညာပေးရုပ်ရှင်ဇာတ်ကားကြီးပါ။ ဒီထဲမှာကာရိုက်တာတော့မသိရသေးဘူး။ အခုဖေ့စ်ဘွတ်ပေါ်မှာဖြစ်နေတဲ့သက်ငယ်မုဒိန်းမှုတွေကို ပညာပေးအနေနဲ့ရိုက်တာပါ။ အစ်မတို့ကျတော့ အခန်းနည်းတယ်။ ကလေးတွေကို ဦးစားပေးရိုက်တဲ့ကားဆိုတော့လေ။ ဒီထဲက ကလေးတွေရဲ့အစ်မပေါ့။ ဘယ်သူ့အစ်မဖြစ်မလဲတော့ မသိသေးပါဘူး။

-သက်ငယ်မုဒိန်းမှုတွေအပေါ် ကိုယ်တိုင်ရော မိန်းကလေးတစ်ယောက်အနေနဲ့ဘယ်လိုခံစားမိပါသလဲ။

မိဘချင်းကိုယ်ချင်းစာတယ်။ ဖေ့စ်ဘွတ်ပေါ်မှာမြင်နေတွေ့နေရရင် ဆက်လဲမကြည့်ချင်တော့ဘူး။ သိတယ်မလား။ သူတို့တွေကို အရမ်းလဲသနားတယ်။ သူတို့မိဘတွေရဲ့ခံစားချက်ကိုလဲ နားလည်တယ်။ ကိုယ်တွေတောင်မှဒီလောက်ခံစားနေရရင် သူတို့မိဘတွေဆိုရင်တော့ပြောမနေနဲ့တော့။ အစ်မတို့ကမြန်မာနိုင်ငံ၊ ဗုဒ္ဓဘာသာနိုင်ငံဖြစ်ပြီး အဲ့ဒီအမှုက အစ်မတို့မြန်မာနိုင်ငံက အများဆုံးဆိုပြီးလဲပြောနေကြတယ်။ အရင်တုန်းကလဲ ရှိရင်ရှိမှာပေါ့။ အခုကဖေ့စ်ဘွတ်ပေါ်လာတဲ့အတွက် ပိုပြီးပေါ်ပေါ်ထင်ထင်ရှိလာတယ်။ သားသမီးချင်း ကိုယ်ချင်းစာတဲ့စိတ်တွေဒီခေတ်မှာ မရှိတော့တာလားလို့တွေးမိတယ်။ ဒီဖက်ခေတ်ကြီးက အရမ်းပြောရခက်တယ်။ လူတွေရဲ့စိတ်ကလဲ ပြောရခက်တယ်။ အဲ့ဒီလိုမျိုးတွေ့လို့ရှိရင် သူများနိုင်ငံတွေမှာဆို သေဒဏ်ပေးတယ်လေ။ ဒီနိုင်ငံမှာလဲ အဲ့ဒီလိုမျိုးသေဒဏ်ပေးစေချင်ပါတယ်။ အဲ့ဒါမှလဲဒီအမှုတွေပပျောက်မယ်လို့ထင်တယ်။ အသက်မပြည့်သေးတဲ့ကလေးတွေကို ဒီလိုလုပ်တယ်ဆိုတာတော်တော့ကို လူစိတ်မရှိတဲ့သူတွေပါ။ အဲ့ဒီတော့ သေဒဏ်ပေးသင့်တယ်လို့မြင်ပါတယ်။

-အခွေလုပ်မယ်လို့ကြားတယ်။ အဲ့ဒါကရော ဘယ်လိုဖြစ်သွားပြီလဲ။

စီတော့စီစဉ်ချင်တယ်။ ဒါပေမဲ့အခြေနေကသိတဲ့အတိုင်း ခိုးကူးခွေတွေကလဲရှိတော့ အဆင်မပြေဘူးဆိုတော့လည်း အဲ့ဒီဖက်ကိုလဲ မလှုပ်ရှားနိုင်သေးဘူး။ နောက်ပြီး အခုသရုပ်ဆောင်ဖက်ဆိုလဲ ဗီဒီယိုက သိပ်မရှိတော့ဘူး။ ပျောက်လုနီးပါးဖြစ်နေပြီဆိုတော့ ကိုယ်လုပ်နေတဲ့ အလုပ်လေးကိုပဲ ပုံမှန်နဲ့အကောင်းဆုံးဖြစ်အောင်လုပ်နေပါတယ်။

-အဲဒါဆိုသရုပ်ဆောင်ဖက်ပဲဇောက်ချပြီးလုပ်ဖြစ်နေမှာလား။ တခြားစီးပွားရေးဖက်ကိုရောကူးပြောင်းဖို့ရှိဦးမလား။

နောက်ပိုင်းတော့ လုပ်ဖြစ်မယ်ထင်ပါတယ်။ ဘာလို့လဲဆိုတော့ ဒီအနုပညာအလုပ်က ပပျောက်လုနီးပါးဖြစ်နေပြီ။ ရုပ်ရှင်ဆိုတာလဲ ဘယ်ချိန်ပပျောက်မလဲ မသိသေးဘူး။ တခြားစီးပွားရေးလုပ်ဖို့က စဉ်းစားနေတုန်းပါပဲ။ ကိုယ့်အနုပညာအလုပ်နဲ့ဆက်လျဉ်းမယ့် အလုပ်တစ်ခုကိုပဲစဉ်းစားရမှာပေါ့။

-ကားရိုက်အခြေအနေကရော အခုနောက်ပိုင်းကျဲသွားတယ်လို့ပြောလို့ရမလား။

အရင်ကထက်စာရင်တော့ ကားရိုက်နည်းသွားတယ်။ ကျဲသွားတယ်။ ရုပ်ရှင်တွေပဲရှိတော့တဲ့အတွက်ပြီးတော့ တစ်လမှာ ရုပ်ရှင်ကားတစ်ကားလောက်ပဲ ရိုက်ရတော့တယ်။ တစ်ခုတော့ကောင်းတယ်။ ၀င်ငွေအနေနဲ့မကောင်းပေမဲ့ပြင်ဆင်ရတာ ဘာညာကတော့ သေသေချာချာလေးပြင်ဆင်လို့ရသွားတယ်။ ရုပ် ရှင်ကားကြီးဖြစ်တဲ့အတွက်ပြင်ဆင်ရတာ ပိုပြီးသေချာလေးလုပ်လို့ရတယ်။

-စီးပွားရေးလုပ်ဖြစ်မယ်ဆို ဘယ်လိုစီးပွားရေးမျိုးကိုစိတ်ဝင်စားလဲ။

ကိုယ်ကဒီအလုပ်နဲ့စပ်လျဉ်းတဲ့အလုပ်ပဲ လုပ်ဖြစ်မယ်။ ဥပမာ အလှပြင်ဆိုင်ဖွင့်တာတို့ဘာတို့ပေါ့။ ဒါပေမဲ့အဲ့ဒါကလဲ စဉ်းစားထားတာပေါ့။ လိုတော့လိုပါသေးတယ်။

-New Year ကိုရော ဘယ်လိုဖြတ်သန်းဖြစ်မလဲ။

အစ်မ အိမ်မှာပါပဲ။ ပျော်ပွဲရွှင်ပွဲတွေ သိပ်မသွားတတ်တာရယ်၊ နောက်ပြီး အစ်မသီချင်းဆိုစရာရှိရင် သွားဆိုမှာဆိုတော့ လူငယ်ဘ၀ပျော်ရွှင်မှုကတော့ သိပ်မရှိပါဘူး။

-ဒီကားပြီးရင်ရော ဘာတွေလက်ခံထားတာရှိဦးမလဲ။

ဒီကားပြီးရင်မြစ်ကြီးနားမှာ သီချင်းဆိုဖို့ရှိတယ်။ နောက်လထဲမှာတော့ အောင်ပန်းမှာကားသွားရိုက်ဖို့ရှိပါတယ်။

Credit :Trend Myanmar