Breaking News

ဂျပန်နိုင်ငံမှာ ထူးခြားတဲ့ ရေပူစမ်းအပန်းဖြေဥယျာဉ် ဖွင့်လှစ်မယ်



ဂျပန်နိုင်ငံရဲ့ အထင်ရှားဆုံးရေပူစမ်းတွေထဲက တစ်ချို့ဟာ Beppu မြို့မှာရှိကြပါတယ်။ ခု Beppu ရဲ့မြို့တော်ဝန်ဟာ စိတ်ကူးအိပ်မက်ဆန်ဆန် ရေပူစမ်းအပန်းဖြေဥယျာဉ်ရဲ့ ထူးခြားတဲ့ ဗီဒီယိုဖိုင်တစ်ခုကို ပြီးခဲ့တဲ့တစ်ပတ်က လူမှုမီဒီယာကို တင်ခဲ့တဲ့အကြောင်း  Mashable အရ သိရပါတယ်။ ချားရထား၊ အပျော်စီးရထားတွေပေါ် ရေနွေးထည့်ထားတဲ့ ရေချိုးကန်တွေနဲ့ ထရော်လီတွေ တွေ့မြင်ရတဲ့ ဒီ ဗီဒီယိုမှာ ပျော်ရွှင်ဖွယ်ရာ ဂိမ်းကစားနည်းအကုန် ပါဝင်နိုင်ပါတယ်။ ယင်းဗီဒီယိုကလစ်ရဲ့အဆုံးသတ်မှာ ဖော်ပြထားတာကတော့ မြို့တော်ဝန် Yasuhiro Nagano အနေနဲ့ Youtube မှာ ဝင်ကြည့်မှုနှုန်း ၁ သန်းပြည့်ပါက ဒီစိတ်ကူးယဉ်ဆန်ဆန်ပုံရိပ်ကို လက်တွေ့အကောင်အထည်ဖော် ဆောင်ရွက်သွားမယ်ဆိုတာပါပဲ။

တနင်္ဂနွေနေ့အထိ အဆိုပါဗီဒီယိုကြည့်ရှုမှု ၁.၉ သန်းနီးပါးရှိနေခဲ့ပြီး ထောက်ခံအားပေးသူတွေ အမြောက်အများရှိနေတာကြောင့် ယင်းရေပူစမ်းအပန်းဖြေဥယျာဉ်ကို လက်တွေ့အကောင်အထည်ဖော် ဆောင်ရွက်သွားဖို့ မြို့တော်ဝန်အနေနဲ့လည်း စိတ်လှုပ်ရှားလျက်ရှိပါတယ်။

ပြီးခဲ့တဲ့အပတ်က မြို့တော်ဝန် သတင်းထုတ်ပြန်ချက်တစ်ခု ပြုလုပ်ခဲ့ကာ အဆိုပါဗီဒီယိုအောင်မြင်မှုအကြောင်း အခိုင်အမာပြောဆိုခဲ့ပြီး မကြုံစဖူး ထောက်ခံအားပေးမှုအတွက်လည်း ပြည်သူတွေကို ကျေးဇူးတင်ကြောင်းပြောဆိုခဲ့ပါတယ်။ အဆိုပါ ရေပူစမ်းအပန်းဖြေဥယျာဉ် ဖွင့်လှစ်မယ့်ရက်ကို အတည်မပြုသေးပေမယ့် မြို့တော်ဝန်အနေနဲ့ စီမံကိန်းတွေ စတင်ရေးဆွဲဖို့ ပြည်သူတွေဆီက အချက်အလက်တွေကို ရယူလျက်ရှိနေကြောင်း သိပါတယ်။


Credit :Trend Myanmar