Breaking News

ဖခင်ကောင်းတစ်ယောက်ဖြစ်လာမယ်မှန်း သိသာစေတဲ့ အချက်များ



ငယ်ငယ်က ကိုယ်အရမ်း သဘောကျခဲ့ဖူးတာ တစ်ခုရှိတယ်။ အခုခေတ်လောက် တက်တူးတွေ ခေတ်မစားသေးတဲ့အချိန်မှာ ကိုယ့်သူငယ်ချင်းရဲ့ အဖေက သူ့သမီးလေးနာမည်ကို ရင်ဘတ်မှာ တက်တူး ထိုးထားတာကို မြင်တော့ အရမ်းကိုအားကျခဲ့ရဖူးတယ်။ သူငယ်ချင်းကလေ သူ့အဖေကို အမေထက် ပိုရင်းတယ်။ အဖေလုပ်သူကလည်း သူ့သမီးအလိုကျ အရာအားလုံး ဖြစ်စေသလို သမီးအတွက် သူ့ကိုယ်သူ အမြဲအသင့်ရှိတဲ့ပုံစံကို သိပ်သဘောကျခဲ့ရတာအမော။ ကိုယ့်အဖေက မချစ်ဘူးလို့ ပြောတာမဟုတ်ပါဘူး။ အဖေကလည်း ကျွန်မတို့ကို အရမ်းချစ်ပေမဲ့ မျက်နှာထားက တည်နေတာများတာရယ်၊ ဆူစရာရှိရင် အမေထက် အဖေကို ပိုကြောက်ရတာရယ်၊ အဖေကလည်း မေတ္တာကို သိပ်ပြလေ့မရှိတာရယ်ကြောင့် စိတ်ထဲမှာ ရင်းနှီးတွယ်တာစိတ်ထက် ယုံကြည်အားကိုးတဲ့အချစ်စိတ်ကသာ ပိုများခဲ့ရပါတယ်။ ကိုယ်တစ်ချိန် အိမ်ထောင်ပြုတဲ့အခါကျရင်တော့ ကိုယ့်သားသမီးတွေကို အရမ်းကို သဲသဲလှုပ်ချစ်တတ်မယ့် သူမျိုးကို လက်တွဲဖော်အဖြစ်တွဲမယ်လို့ စိတ်ကူးခဲ့တယ်။ ဒီလိုစိတ်ကူးရှိတဲ့ မိန်းကလေးများအတွက် ကိုယ့်ခင်ပွန်းလောင်း ဖြစ်ဖြစ်၊ သားသမီးမရသေးတဲ့ ခင်ပွန်းဖြစ်သူဖြစ်ဖြစ် အလုပ်အပေါ်မှာပဲ အာရုံမထားဘဲ သားသမီးကို သဲသဲလှုပ်ချစ်တတ်တဲ့ ဖခင်ကောင်းတစ်ယောက်ဖြစ်လာမလားဆိုတာ သိနိုင်မယ့်အချက်တွေကို ပြောပြပေးချင်ပါတယ်။

သူ့မှာ ကလေးတွေရယ်အောင် ပြောနိုင်တဲ့ ဟာသတွေရှိတယ်။  ဖြတ်သန်းမှုအမျိုးမျိုးကြုံခဲ့ရတဲ့ လူကြီးတွေရဲ့ ဟာသတိုင်းက ကလေးတွေကို ရယ်မောအောင် မလုပ်နိုင်ပါဘူး။ သူတို့ရဲ့ ဖြူစင်တဲ့ဦးနှောက်၊ နုနယ်တဲ့ နှလုံးသားလေးတွေနဲ့ လိုက်လျောညီထွေရှိတဲ့ ရယ်စရာတွေကိုမှ သူတို့ရယ်မောတတ်တာပါ။ သင့်ရဲ့ အမျိုးသားက ကလေးတွေကို ရယ်မောပျော်ရွှင်စေတာကို သင်မြင်ရင်တော့ စိတ်ချလိုက်ပါ။ သူ့ရဲ့ ကိုယ်ပိုင်သားသမီးတွေကျရင် သူပိုပြီးပျော်ရွှင်အောင်ထားနိုင်မှာပါလို့။

သူ့ရဲ့ ဖေ့စ်ဘွတ်အကောင့်တွေ၊ တွစ်တာအကောင့်တွေမှာ ကလေးပုံတွေကို မကြာခဏ တင်တတ်တဲ့၊ ရှဲတတ်တဲ့ ယောက်ျားလေးတစ်ယောက်ကလည်း နူးညံ့တဲ့နှလုံးသားရှိပြီး မေတ္တကို လှိုက်လှိုက်လှဲလှဲပြတတ်တဲ့ ဖခင်မျိုးဖြစ်နိုင်ပါတယ်။

ကလေးတွေကို အပြစ်မမြင်တတ်ဘူး။ ကလေးတွေဆိုတာ အဆော့သန်ပါတယ်။ အဖွသန်ပါတယ်။ ကလေးတွေရဲ့ အကျင့်စရိုက်ကို နားလည်တတ်ပြီး သန့်ရှင်းရေးကူလုပ်ပေးတတ်သူ၊ ကူညီပေးတတ်သူတစ်ယောက်ဆိုရင် ကလေးရဲ့ အနွံတာခံပြီး ကလေးတာဝန်ဆိုတာ အမေတစ်ယောက်တည်းရဲ့ တာဝန်လို့ယူဆတတ်တဲ့ ယောက်ျားမျိုးမဖြစ်နိုင်ဘူးလို့ ယူဆနိုင်ပါတယ်။

ကလေးတွေရဲ့ သူငယ်ချင်းနံမည်တွေကအစ သိတယ်။ ကလေးတွေကို လူကြီးတစ်ယောက်လို အလေးပေးဆက်ဆံတတ်ရုံမက သူတို့ရဲ့ ပြဿနာတွေ၊ သူတို့ သူငယ်ချင်းနံမည်တွေကအစ စိတ်ဝင်တစားနဲ့ သိနေတတ်တဲ့ ယောက်ျားလေးတွေက သားသမီးအပေါ် အရမ်းကို တွယ်တာ ဂရုစိုက်တတ်တဲ့ ဖခင်ကောင်းတွေရဲ့ လက္ခဏာဖြစ်ပါတယ်။

ကလေးတွေကို ပုံပြင်ပြောပြတတ်တာ၊ စာဖတ်ပြတတ်တာ  စိတ်မရှည်တတ်တဲ့လူတစ်ယောက်က ဘယ်လိုမှ ကလေးတစ်ယောက်ရဲ့ စူးစမ်းလိုစိတ်၊ သိလိုစိတ်တွေကို အဖြေရှာမပေးနိုင်ပါဘူး။ ကလေးတွေ သိချင်တဲ့အရာ၊ သိသင့်တဲ့အရာတွေကို စိတ်ရှည်လက်ရှည်နဲ့ စာဖတ်ပြရင်း၊ ပုံပြင်ပြောရင်းနဲ့ သင်ပေးသွားတတ်တဲ့ အမျိုးသားတစ်ယောက်ရဲ့ အပြုအမူက ဖခင်ကောင်းတစ်ယောက်ဖြစ်လာမယ့် အပြုအမူတစ်ခုဖြစ်ပါတယ်။


Credit :Trend Myanmar